ZoZie Zwollerkärspel

herinneringen moet je maken

Zwollerkärspel #3 Langenholte

Buurskap Langenholte
De buurskap Langenholte lig op een zandrugge die in 't Weichselien is evörmd deur op-eweid zand, zogenaemd dekzand. Der wört veur ‘t eerstes melding emaakt van Den Hoff toe Langenholte in 1401. Van eurspronk is Langenholte een märke. Disse was elègen tussen de märken Dieze en Berkum en wört an de andere zieden begrensd deur de revieren de Vechte en ‘t Zwärte Water. Buurskappen bint vaeke in de volksmond ontstaon, as benaeming veur de locasie van een verzameling van uzen, boerderi’jen of buurskappen. Zie bint ontstaon in gebieden wöör men vri’j is zich te vestigen, zukke gebieden nuumt men ok Ering. Umdät ‘t vri’j was, was ter dan ok gien zeggenskap van of aover zo’n plase. Dit in tègenstelling töt een buurskap of een boerskap, wöör een eer of boeren 't veur 't zeggen adden van of aover ‘t plasien. Soms wier een buurskap of boerskap op-e-even en wier dan een buurskap of een ge-ucht as ‘t klein genog was. Bouwen men ter plase een kärk(ien), mölle of een kroegien, dan kon ‘t deurgruuien naor een (kärk)dörp. Dät is ier dus niet ‘t geval, Langenholte is een buurskap eblöven.

Langenholte en iezertied
In 1984 bint ter sporen van de iezertied evunnen langes de Brinkhoekweg op ‘t peseel enaemd “De Kamp”. ‘'t Peseel, dät op een oge zandkop lei, lag vrogger an een Vechtärm, wat nog goed is te zien. Der bint verskillende sporen van paolgaten en uusofval evunnen. Uut een plattegrond van enkele paolgaten wier vastesteld dät ter een “spieker” mut ebben estaon. Een “spieker” is een opbärgskure met meestentieds veer paolen die in de buurte van een boerderi’je ston. Ok wier ter een koele evunnen, wöörin onderden verkaolde eikels leien. Dät wört ok as een spoor uut de iezertijd beskouwd.

Butenlanden Langenholte
An de grenzen van Langenholte mond de Aoveriesselse Vechte uut in ‘t Zwärte Water. De butendiekse gröslanden van disse revieren maken ier deel uut van ‘t netuurreservaat Buutenlanden Langenholte. &lsquo't Gebied is vanwège zien grote kwetsbaereid niet toegankelijk. Landskap Aoveriessel stemt ‘t be-eer veural of op de beskärming van de zeldzame kieftebloeme. Ok is ‘t een belangriek faunagebied, wöör zeldzame weidevaogels veurkommen, wööronder kempanen.